Galicia ten 15.000 vivendas de uso turístico habilitadas pola Xunta, que algúns concellos queren frear

• Apartamentos céntricos, de deseño e ben equipados son os máis solicitados

Vivendas turisticas

Vivenda tipo

Apartamento céntrico, de deseño, con capacidade para cinco persoas, por entre cen e cento cincuenta euros a noite, segundo tempada. Visitamos unha vivenda de uso turístico que se anuncia así nos portais de internet. É unha das setecentas que operan en Santiago coa licenza da Xunta.

“Ben xestionada, podes gañar o dobre que cun alugueiro tradicional“

“Se está ben xestionada, podes gañar o dobre que cun alugueiro tradicional. É certo que o alugueiro turístico non ten ningunha vantaxe fiscal, que si ten o tradicional, e que require máis traballo, pero ten máis rendemento”, sinala Óscar Soneira, propietario dunha vivenda de uso turístico na capital galega e directivo da Asociación de Vivendas Turísticas de Galicia (Aviturga).

Legalidade

Unha recente sentenza do Tribunal Superior de Xustiza de Galicia obrigou a pechar un destes aloxamentos por carecer de licenza municipal. Só unha trintena das setecentas rexistradas en Santiago teñen esta habilitación, segundo o Concello. O resto, asegura, teñen que pechar e xa abriu 350 expedientes de disciplina urbanística.

“A Xunta non podería estar inscribindo unha actividade económica que precisa desa licenza “

“Para nós está clarísimo. A Xunta de Galicia non podería estar inscribindo, como así o fixo durante moitos anos, unha actividade económica que precisa desa licenza e que é imprescindible aquí e en calquera sitio”, indica Mercedes Rosón, concelleira de Urbanismo de Santiago.

Pero desde Aviturga rebaten esa postura. Defenden que abonda coa inscrición no rexistro autonómico, creado en 2017, e critican o intento de sentar xurisprudencia en base a cuestións particulares.

“Temos outras sentenzas a favor das vivendas de uso turístico dictadas polo Tribunal Superior de Xustiza de Galicia“

“Xurisprudencia só sentan as sentenzas do Tribunal Supremo. É certo que é unha referencia importante, pero xa temos outras sentenzas a favor das vivendas de uso turístico dictadas polo Tribunal Superior de Xustiza de Galicia”, di Óscar Soneira.

O Concello de Santiago aprobará antes de que remate o ano unha modificación do seu plan de urbanismo para limitar as vivendas de uso turístico a baixos ou primeiras plantas de edificios residenciais e fóra do casco histórico. O que si permitirá é o alugueiro vacacional un máximo de dous meses ao ano, como economía colaborativa. É o que fai a familia de Beatriz Torres. Xa ten un piso non ensanche compostelán e agora está reformando outro para alugalo a estudantes durante o curso e a turistas en xullo e agosto. “Ningún estudante quere un piso durante doce meses ao ano, quéreno dez meses. O que viamos é que os dous meses de verán eran perdidos. Así que cando apareceu a posibilidade da vivenda de uso turístico pareceunos unha oportunidade”, asegura Beatriz Torres. Esta propietaria agarda a que o concello publique a nova normativa para dar de alta o segundo piso e confía en poder seguir operando co primeiro.

Sanxenxo e Santiago

Santiago é o segundo concello galego con máis aloxamentos deste tipo, despois de Sanxenxo. O sector di que non aumentaron nos últimos tres anos, pero concello e inmobiliarias cúlpanos de distorsionar o mercado de alugueiro.

“Provocou o baleirado da oferta de pisos dispoñibles para alugueiros de longa duración e cos prezos disparados“

“É un desequilibrio importante. Provocou o baleirado da oferta de pisos dispoñibles para alugueiros de longa duración. Hai moi poucas opcións e os prezos están disparados”, sostén Carlos Debasa, presidente da Asociación Galega de Inmobiliarias.

“En Santiago temos un problema enorme, que afecta ao noso ecosistema e mesmo á nosa propia identidade“

“En Santiago temos un problema enorme, que afecta ao noso ecosistema e mesmo á nosa propia identidade”, asegura a concelleira de urbanismo Mercedes Rosón, aludindo á perda de veciños e de servizos que fan cidade. Aviturga insiste en que o problema do alugueiro en Santiago non son as 700 vivendas de uso turístico, “o problema son as 9.000 vivendas que están baleiras, igual hai que actuar sobre iso e non buscar excusas como está facendo o Concello”.

En toda Galicia hai 15.000 vivendas de uso turístico, segundo o rexistro da Xunta. Hai cinco anos, cando se creou, había 542.