O conflito pola titularidade do terreo pon en risco 250 empregos nunha empresa de lousa de Valdeorras

• Os traballadores dunha louseira ameazada por unha orde de desafiuzamento retomaron as mobilizacións
• O seu futuro está en mans da xustiza polo desacordo entre a empresa e a comunidade de montes

O conflito pola titularidade do terreo pon en risco 250 empregos nunha empresa de lousa de Valdeorras

Os traballadores protestaron diante dos xulgados do Barco de Valdeorras. Reclaman xustiza para que se paralice a nova orde de desafiuzamento dos terreos que ocupa a louseira, previsto para o 29 de novembro.

De executarse, quedarían sen emprego 250 persoas. Son as vítimas da loita xudicial entre a empresa e a comunidade de montes que se considera dona dos terreos e que recorreu a súa expropiación forzosa.

Os traballadores opóñense ao desafiuzamento

Anxo García, secretario comarcal da CIG en Ourense indica que “se hoxe Irosa está traballando é exclusivamente porque os traballadores e as traballadoras que están aquí se plantaron e botaron fóra aos que ían desafiuzar a empresa. Se non, estaba precintada e a xente estaría pedindo o paro”.

A empresa tamén se atribúe a propiedade dos terreos. Por iso, asegura que a resolución do conflito só depende de que a comunidade de montes retire a solicitude de desafiuzamento ou de que o xulgado acceda a paralizalo ou a adialo.

“Que nos queiran botar diso que é noso, a verdade é que non é normal. Esperamos que sen tardar a xustiza nos dea a razón“

“Nós temos o dereito sobre os terreos propios, temos o dereito sobre o terreo expropiado”, asegura Rogelio López, presidente do grupo Irosa Samaca. “Que nos queiran botar diso que é noso, a verdade é que non é normal. Esperamos que sen tardar a xustiza nos dea a razón”, engade.

Para a comunidade de montes a solución pasa porque a empresa lle pida á Xunta que anule o proceso de expropiación dos terreos que segundo unha sentenza xudicial está a ocupar ilegalmente dende 2015.

Perdas millonarias

José Antonio Iglesias é o avogado da comunidade de montes: “A solución é que o peticionario da expropiación comunique ao órgano que expropiou estes terreos que desiste desa expropiación. A comunidade o único que pretende é recuperar eses terreos para seguir sendo titular dos mesmos”.

Como consecuencia deste conflito, a empresa non pode vender seis millóns de euros en lousa porque o almacén está precintado por orde xudicial.