A viaxe que acabou mal: regresan os estudantes confinados en Mallorca

• Os 21 mozos galegos que permanecían en corentena nun hotel en Palma saíron da illa nun ferri
• Unha resolución xudicial anulou o confinamento dos que non deron positivo nas probas

Volven os estudantes confinados

Os 21 estudantes galegos confinados en Mallorca saían esta mañá do hotel covid. Partían ás dez nun transbordador rumbo a Valencia, a onde está previsto que cheguen ás cinco da tarde.

O plan é que alí lles fagan unha PCR.  Os negativos viaxarán en autobús a Galicia e, se hai positivos, farano en ambulancia.

Falamos coa nai dunha rapaza de Vimianzo. En concreto os nove desta localidade da Costa da Morte chegarán á casa de madrugada.

“A duración da viaxe será de máis ou menos doce horas desde Valencia a Vimianzo –indica María Isabel Pose–. Estamos en contacto coa Consellería de Sanidade que nos vai dicindo todo sobre a viaxe, se os nenos están ben, a comida que lles dan... Cando cheguen a Vimianzo non sabemos onde se fará a corentena”.

Desconfinados por orde xudicial

O desconfinamento produciuse porque unha xuíza sentenciou que a 118 mozos e mozas se lles limitou un dereito fundamental. Son negativos en covid. Alegou que non queda acreditado que foran contactos estreitos de positivos e tampouco que participaran en actividades de risco.

“Ser prudente, corentenar..., estamos vendo positividade de casos que deron primeiro negativo e ás 48 ou 72 horas se positivizan“

O conselleiro de Sanidade, Julio García Comesaña, manifestouse de acordo coa actuación das autoridades das illas: “Nós faríamos exactamente o mesmo que fixo a Consellería de Saúde de Baleares. Ser prudente, corentenar..., estamos vendo positividade de casos que deron primeiro negativo e ás 48 ou 72 horas se positivizan, e ante esa experiencia, o más prudente é que queden e non se expoñan eles ni ao resto de pasaxeiros de calquera medio de transporte que os poida sacar de Baleares”.

O que parece agora é que os estudantes galegos van ter que illarse, e xa non na illa, senón ao chegaren a casa. As familias están á espera de información.