Ofresemos informasiones sovre la poeta sefardí Ester Morguez Algranti, ke dedikó gran parte de su vida a la poesía sovre el Holocausto (Shoá) i fue una mujer adelantada a su tiempo. Ester Morguez Algranti ke eskrivió en muestra lingua, en djudeo-espanyol era nasida en Turquía el 19 de Marzo de 1916 i es por esta data ke keremos azer este programa-omenaje a Ester ke murió en Izmir, (Esmirna) el 26 de Febrero de 1984. Sus estudios de la eskola primaria los izo en la Red eskolar de L' Alliance Israelite Universelle de su sivdad. Su madre fue Bejora Malká Rosanes, su padre Jacob Algranti fue ken la ambezó en el estudio de los tekstos sagrados i desde chikitika azía prédikas en la Sinagoga Portuguesa de la sivdad onde nasió. Su fotó formó parte de las 36 mujeres djudías pioneras en su línea de lavoro en la Ekspozisión "La primer mujer judía turca professional", en Octubre en 2014 en Estambul. Te kontamos la vida de Ester en este omenaje, esta mujer ke eskrivía poesía, ma tambyén eskrivió sovre destakadas mujeres. Ester Morguez Algranti se identifikó kon la dolor por la destruisión de las Komunidades Evropeas Djudías i luchó por la djustisia, la responsabilidad i el rekonosimiento del mundo por entero de este preto echo.(manaderos: Profesora Susy Gruss) Los kantes ke akompanyan este programa son "Pásharo de ermozura" en la versión de Janet & Jak Esim, "Oh, mis hermanos" kante de Judy Frankel i "Esta montanya d'enfrente" en la versión del Trío Sefarad. Kurunamos el programa kon el kante tradisional "Quando el Rey Nimbrod" en la interpretasión de Jana Lewitová.
