Ofresemos a los oyentes la istoria de la destakada famyia Pardo de Saloniki, una importante Komunidad Sefardí, mos sentramos en el siglo XVII. Joseph Pardo se dedikó a la ensenyansa de la tradisión i ley djudía a los konversos, tambyén ensenyó la lingua kasteyana, en Ámsterdam fue shefe de la Komunidad Djudía asta su muerte.
Kontinuamos kon grandes savios, la figura de Hillel, Rabino i Sabio de la Toráh, partajamos un relato sovre su pasensia i buendad en un muevo kapitoló de literaturas en djudeo-espanyol.
En Patrimonio muzikal eskojimos tres enshemplos en este programa, el kante tradisional: "Abraham Avinu", interpretado por Soledad Bentolila y el romanse "El Rey que muncho madruga" versión de Jana Lewitová i Rudolf Merinsky, del Cd Sephardic Songs. Kurunamos el programa kon el kante bíbliko "Moshé salió de Mitzraim", interpretado por Viviana Rajel Barnatán.
