Vos azemos musafires para kompartir las literaturas poétikas sefardim, los kantes i la kuzina kon richas rechetas de muestra tradisión. Prinsipiamos el programa kon un kante de bodas "Novia de la kara blanka" en la interpretasión de Mónica Monasterio, oy la kuzina la poesía i la múzika se engalanan para los oyentes en una mueva entrega kultural. Kontinuamos kon la poesía del autor sefardí Vitaly Sadacca, un poeta nasido en Turquía ke ekspresa sus sentimientos traverso sus poesías, munchas de eyias aparesen en djurnales sefardim, kompartimos su "Deklarasión de un viesho" i "Siertas pensadas", refleksiones sovre la vida de un gran poeta. Indemás entre los kantes sentimos "Abraham Abinu" en la versión de la kantadera sefardí Soledad Bentolila, i un kante litúrjiko "Non komo Muestro Dió" (En kelohenu) en la versión de Flory Jagoda. Para kontinuar kon savores en la mesa sefardí vos azemos musafires en la "Kuzina de Emisión Sefarad" onde la berendjena es la reina en la kuzina sefardí, aparejamos la recheta tradisional de "Alburnía". Kurunamos el programa kon el kante kontemporáneo de la autoría de Flory Jagoda "Las Tijas" para selevrar la vida i los rikos savores sefardim.
"La palavra krea, la radio transmite, en Emisión Sefarad muestra literatura, múzika i kuzina siempre para los oyentes".
