Compartimos un muevo kapitoló kultural kon la istoria de la vida del gran poeta Shlomo Ibn Gabirol, poeta malaguenyo nasido en 1021 ke destakó en su kreasión literaria kon ovras komo "Keter Maljut" (Kurona Real), "Fuente de la vida" i diversas ovras en linguas árave i evreo. Desde su chikez a kavsa de sus provlemas físikos i jazinuras su poesía reflekta momentos trájikos, ma tambyén destaka en su poesía litúrjika i relijiosa.
Meldamos una poesia del gran Shlomo Ibn Gabirol titulada en lingua ivrit "Ahavá" (Amor).
Ansimezmo kontinuamos el programa kon poesía de kreasión kontemporánea en las letras de la eskritora sefardí de orijin italiano Matilda Koen Sarano. En Patrimonio muzikal eskojimos distintos kantes tradisionales komo "Ventanas altas" del CD Todas las Voces de Sefarad, una kompla de Tu Bishvat "El debate de las flores" en la versión oral aresivida por Viviana Rajel Barnatán de Clarita Benahim, z'l de la CJM.
Para kurunar este programa dedikado a la poesía i la múzika sentimos el romance "Diego León" en la boz de la kantadera de Brasil, Fortuna.
