Djudería de Alcalá de Henares: konosemos su arkitektura, moradas, Sinagogas i vida sosial.
Muestro programa se sentra oy en la deskonosida Djudería de Alcalá de Henares, konosemos su arkitektura, istoria i a komo era la vida djudía en Alcalá de Henares. Sentimos a los oyentes i sus mesajes en el Whatsapp de Radio Exterior de España (+34 680 688698) kon felisitasiones por las temátikas de los programas i sus opiniones. Poko o nada se konose de la Djudería de Alcalá de Henares, en este kapitoló Gonzalo Viñuales Ferreiro, Profesor de Historia Medieval de la Universidad Rey Juan Carlos mos ofrese en su konferensia "Alcalá de Henares: Su Patrimonio Cultural Judío y el Turismo" dientro del Siklo "Huellas y Patrimonio Cultural de los Judíos para el Turismo en la Comunidad de Madrid", en Centro Sefarad-Israel moderado por la Profesora Nuria Morere Molinero (URJC) una detalyada istora de la arkitektura de las moradas o kazas de los djudiós espanyoles en Alcalá de Henares. No soltanto la vida se desvelopava en la Calle Mayor, la prinsipal de la Djdudería, ma tambyén en afamadas kalejas de Alcalá komo Santiago i Escritorios, onde yegavan kalejas estrechas típikas de las djuderías de Sefarad. Un dato interesante a konoser es ke en Alcalá de Henares en la anyada 1474 se topavan un karar de 111 famyias ke desvelopavan su vida, entre sus kumersios de karniserías, artesanos, traperos i más lavoros atados a la vida sosial, sin ulvidar el semetrio djudió por fuera de los muros de la Djudería. Gonzalo Viñuales mos informa tambyén de los diferentes lugares komo más partikolares i los komunitarios i púvlikos. En este programa konoseremos datos istórikos dokumentados komo ke Alcalá de Henares kontava kon 2 Sinagogas, ansimezmo las fraguas i materiales kon ke los djudiós fraguavan sus moradas. Muncho más en un interesante programa istóriko. Kurunamos el programa kon un ermozo kante tradisional sefardí "Arvolés yoran por luvias" en la interpretasión de Isaac Levy. "La istoria sale a la lus: Djuderías ke se topan okultas traverso los tiempos, komo la de Alcalá de Henares, sólo en Emisión Sefarad".
