Ofresemos un programa kontinuando kon la selevrasión de la musher en bozes poétikas, kon Rita Gabbai. A la okasión de los 500 anyos de la ekspulsión de los djudiós de Sefarad, Rita Gabbai Simantov, poeta sefardí dedikó su ovra en esta importante konmemorasión "Quininetos anios depués" ansí dize la autora sefardí: "Mis poemas son dedikados a mi Nona, mis padres i mi esfuegra ke me trasmetieron la konosensia de esta lingua magnífika"... Rita Gabbai es una poeta i eskritora kontemporánea sefardí nasida en Atenas (Grecia) i su famyia es de orijín sefardí de Turquía, ke prinsipió a eskrivir al eskapar (dar fin) su viashe a Sefarad (España), tiera de sus antepazados. Kompartimos varios enshemplos de su ovra: "Solo en tí", "Hei! Hermano!", "Silencio" i el poema "Ninias de Salonik" onde la autora aze un omenaje a las ninias de Salonik ke yenas por entero de vida fueron eksterminadas del modo más kruel en los kampos de eksterminio nazi. Son konseshas poétikas i el legado de "muestra lingua" komo ese valutozo tresoro aresivido de sus padres i Nona. Patrimonio muzikal: kante kontemporáneo kon letra de Rita Gabbai "Kuando Nona se vistía" interpretada por Mónica Monasterio, Romanse tradisional sefardí "Tres ermanikas eran", en versión de Janet & Jak Esim i "Nana de Salónica" en la boz de Mónica Monasterio. Kurunamos el programa kon el kante de bodas "Ah, Siniora Novia" interpretado por Rosa Zaragoza. "Emisión Sefarad, por las ninias de Salonik i todas las ke pedrieron sus vidas en tiempos de los nazis "
