Prinsipiamos el programa kon la aktualidad en España, esta semana kon la Kumbre de la Otan en Madrid, un importante sukseso onde se toparon akodros destakados entre los grandes shefes de governos i su vishita ofishial a España, una Kumvre ke destakó en todos los rolos. Kontinuamos informando sovre la guerra en Ucrania.
Dedikamos el programa al nasimiento en la kultura sefardí, festejos i alegrías en famyia para aresivir una mueva vida. Partajamos enshemplos poétikos, komo la poesía tradisional sefardí sovre el nasimiento en la boz de Matilda Gini Barnatán i diversitá de kantes de kriatura, ansí komo kantes dedikados a la madre "Cantiga de la madre", a los padres "A mamá y a papá", litúrjikos i para rengrasiar al Dió komo "Bendigamos al Altésimo" i nanas komo "Durme durme" en la versión de Viviana Rajel Barnatán (aresivida por tradisión oral de Clarita Benahim, z'l de la CJM) i "Durme durme, kerido ijiko", kante de kriatura, versión Janet & Jak Esim.
La alegría de la mueva vida se akompanya de kantes i dulsurias ansí komo rikos platikos de komida tradisional sefardí.¡Mazal tov!
