Kontinuamos informando sovre la istoria de Aljamas en la Comunidad de Madrid: Buitrago de Lozoya i San Marín de Valdeiglesias. En Buitrago de Lozoya topamos informasiones sovre su Aljama, los lavoros de los djudiós, i algunos destakados presonajes djudiós ke eran administradores del Rey i lavoravan en las Cortes. La prezensia djudía en Buitrago de Lozoya ya se topa siguro para fines del S XIII komo se dokumenta en el Padrón de Huete. Los djudiós pagavan un alto karar de impuestos, ansí ke kontavan kon un importante rolo ekonómiko, i eran duenyos de tieras, vinyedos, munchas moradas o kazas. Sus Sinagogas. Ansimezmo en la Aljama de San Martín de Valdeiglesias, onde se dokumentan un karar de asta 100 famyias djudías o un poko más unos 500 550 djudiós, los vizinos djudiós serían un total del 10 en sien de la povlasión. Indemás investigasiones sovre los djudiós ke se konvirtieron al kristianismo para poder rekuperar sus vienes i vidas en Sefarad, dempués de ser ekspulsados (Djudeokonversos).
Enrique Cantera Montenegro, Catedrático de Historia Medieval de la UNED i eksperto en la istoria Medieval i en las Djuderías o Komunidades Djudías espanyolas mos ofrese interesantes datos ke partajamos kon los oyentes. Kurunamos el programa kon el kante tradisional sefardí "Yo m'enamorí" en la interpretasión de la kantadera sefardí Fortuna.
